台語聖經 | 社團法人台灣麥穗田使命協會

走到哪裡都有麥子

走出你的個人世界 WITH

走到哪裡都有麥子～

聯繫我們

聯繫資訊

新北市永和郵局238號信箱 (02)2926-5882 .0987-300-005 服務信箱：info@awheat.org 捐款支持

線上台語聖經

麥穗田首頁線上台語聖經

台語聖經

經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -

詩篇第107章

章節快速選擇 :

上下篇聖經查閱：約伯記箴言回到目錄

107:1	恁著感謝耶和華，因為伊是好；因為伊的慈愛永永佇啲！
107:2	耶和華所救贖者著講這話，就是伊對對敵手中所救贖者，
107:3	對逐國，對東對西，對南對北，所聚集的攏著按呢講。
107:4	𪜶佇曠野拋荒的路漂流，尋無城通徛起，
107:5	也枵也嘴乾，𪜶的心神昏去。
107:6	𪜶就佇苦難中哀求耶和華；伊對𪜶的患難中拯救𪜶，
107:7	閣導𪜶行直的路，互𪜶去到通徛起的城。
107:8	為著耶和華的慈愛及伊對世間人所行的奇事願人攏謳咾伊；
107:9	因為伊互迫切欣慕的心得著知足，互枵餓的心得著好物夠飽。
107:10	許個坐佇黑暗死蔭中的人，受困苦及鐵鍊把縛的人，
107:11	是因為𪜶悖逆上帝的話，看輕至高者的旨意。
107:12	所以，伊用勞苦教乖𪜶的心；𪜶跋倒，無人扶助。
107:13	𪜶就佇苦難中哀求耶和華；伊對𪜶的患難中牽救𪜶。
107:14	伊對黑暗死蔭中導𪜶出來，掇斷縛𪜶的索。
107:15	為著耶和華的慈愛及伊對世間人所行的奇事願人攏謳咾伊；
107:16	因為伊拍破銅的門，斬斷鐵的門楗。
107:17	戇人因為𪜶的過失，閣因為𪜶的罪惡受苦楚。
107:18	𪜶的心厭惡逐樣的食物，就倚近死的門。
107:19	𪜶就佇苦難中哀求耶和華；伊對𪜶的患難中牽救𪜶。
107:20	伊出命令醫好𪜶，救𪜶脫離死無。
107:21	為著耶和華的慈愛及伊對世間人所行的奇事願人攏謳咾伊。
107:22	亦願𪜶獻感謝的祭，出歡喜的聲講起伊的所做！
107:23	坐船過海，佇大水中經營事業者，
107:24	𪜶看見耶和華的所做，及伊佇深淵所行的奇事。
107:25	因為伊一下命令，狂風就起，海中的湧就夯起來。
107:26	𪜶上到穹蒼，落到海底；𪜶因為危險神魂就消散。
107:27	𪜶顛顛倒倒，東倒西歪，親像酒醉的人；𪜶的智慧無法可施。
107:28	𪜶就佇苦難中哀求耶和華，伊對𪜶的患難中導𪜶出來。
107:29	伊互狂風定，海湧就平靜。
107:30	風定湧靜，𪜶就歡喜；伊就導𪜶到所愛去的海口。
107:31	為著耶和華的慈愛，及伊對世間人所行的奇事願人攏謳咾伊。
107:32	願𪜶佇百姓的會中尊伊做高，佇長老的坐位謳咾伊！
107:33	伊互江河變做曠野，互水泉變做乾燥的地，
107:34	伊互肥地變鹹的地；攏是因為徛起佇遐的人的罪惡。
107:35	伊互曠野變做潭窟，互乾地變做水泉。
107:36	伊互枵餓的人踮佇遐，互𪜶會起造通徛起的城，
107:37	閣種作田園，栽葡萄，得著所出的土產。
107:38	伊閣賞賜福氣互𪜶，互𪜶生湠多多，亦互𪜶的精牲無減少。
107:39	𪜶閣因為暴虐、患難、憂苦，就減少閣卑低。
107:40	伊互貴族受看輕，互𪜶漂流佇拋荒無路的所在。
107:41	總是伊舉起喪鄉人，互𪜶脫離苦難，互伊的家族興旺親像羊群。
107:42	正直的人欲看見來歡喜；一切歹人的嘴欲塞密。
107:43	見若有智慧的人，欲關心諸個代誌，亦欲數念耶和華的慈愛。

- 本章節結束 -

上一章下一章