走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 71:1 | 耶和華啊，我倚靠你；求你互我永永無見誚！ |
|---|---|
| 71:2 | 照你的公義拯救我，互我脫離；俯耳孔聽我，來救我！ |
| 71:3 | 求你做我通徛起的石磐，互我常常去踮遐；你已經命令欲救我，因為你是我的山巖，我的山寨。 |
| 71:4 | 我的上帝啊，求你救我脫離歹人的手，脫離不義及殘忍的人的手頭。 |
| 71:5 | 因為主──耶和華，你是我所向望的；對我少年的時，你是我所倚靠的。 |
| 71:6 | 我對胎裡互你扶持；互我出老母的腹肚的是你。我欲常常謳咾你！ |
| 71:7 | 多多人掠我做奇怪，總是你是我堅固逃閃的所在。 |
| 71:8 | 我滿嘴欲謳咾你，通日欲榮光你。 |
| 71:9 | 我年老的時，求你呣通放拺我！我氣力衰膦的時，求你呣通離開我。 |
| 71:10 | 因為我的對敵議論我；許個當等欲害我的生命者相及參詳， |
| 71:11 | 講：上帝已經放拺伊；今著追趕伊，掠伊！因為無救伊的。 |
| 71:12 | 上帝啊，求你呣通離開我遠遠！我的上帝啊，求你緊緊來幫助我！ |
| 71:13 | 願許個做我生命的對敵的，受見誚滅無；願許個計謀害我的，受凌辱漏氣。 |
| 71:14 | 總是我欲常常向望，我欲愈久愈謳咾你。 |
| 71:15 | 你的公義以及你的拯救算𣍐了，我的嘴通日欲講起。 |
| 71:16 | 我欲來講主──耶和華大權能的事；我單單欲講起你的義。 |
| 71:17 | 上帝啊，對我少年的時，你有教示我；到現今，我曾報揚你奇妙的所做。 |
| 71:18 | 上帝啊，我到年老頭毛白的時，求你呣通放拺我！聽候我將你的氣力指示下代，將你的大權能指示一切將來的人。 |
| 71:19 | 上帝啊，你的義真高；上帝啊，你曾行大的事，是誰會親像你！ |
| 71:20 | 你是互阮歷過多多大患難的，你欲互阮閣再活，也欲救阮對地的深淵起來。 |
| 71:21 | 求你互我愈高大，閣倒轉安慰我。 |
| 71:22 | 我的上帝啊，我欲彈瑟謳咾你，謳咾你的真實！以色列的聖者啊，我欲彈琴謳咾你！ |
| 71:23 | 我唱歌謳咾你的時，我的嘴唇以及你所救贖我的靈魂欲歡喜出聲； |
| 71:24 | 閣我的舌歸日欲講論你的義，因為許個計謀害我的人已經見誚受凌辱。 |
