走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 89:1 | 〔以斯拉人以探教示的詩。〕我欲唱歌謳咾耶和華的慈愛，到佇永遠；欲用我的嘴傳你的信實到代代。 |
|---|---|
| 89:2 | 因為我曾講：慈愛欲受建立到永遠；你欲將你的信實堅固佇天裡。 |
| 89:3 | 我及我所揀的人立約，對我的奴僕大衛咒誓： |
| 89:4 | 我欲互你的後裔，堅固到永遠；閣互你的寶座，建立到代代。（細拉） |
| 89:5 | 耶和華啊，諸個天欲謳咾你的奇事；佇聖者的會中，欲謳咾你的信實。 |
| 89:6 | 佇空中是誰會比得耶和華？大權能者的眾子中，是誰會親像耶和華？ |
| 89:7 | 伊佇聖者的議會中，是大大有威嚴的上帝，比一切佇伊四圍的閣卡通驚畏。 |
| 89:8 | 萬軍的上帝──耶和華啊，叨落一個大權能者親像你耶和華？你的信實佇你的四圍。 |
| 89:9 | 海水漲高你管轄伊；海湧夯起來，你互伊平。 |
| 89:10 | 你拍碎拉哈伯，親像已經刣死的人；你用有氣力的手拍散你的對敵。 |
| 89:11 | 天屬你，地亦屬你；世界及其中所充滿的攏是你所建立。 |
| 89:12 | 南北是你所創造；他泊及黑門因為你的名來歡喜。 |
| 89:13 | 你有大權能的手；你的手有力，你的正手抬高高。 |
| 89:14 | 公平及義理是你的寶座的地基；慈愛及誠實行佇你的面前。 |
| 89:15 | 會識歡喜的聲者，彼個百姓有福氣！耶和華啊，𪜶佇你的面所發出的光啲行。 |
| 89:16 | 𪜶日日因為你的名來歡喜，因為你的公義得著升高。 |
| 89:17 | 因為你是𪜶氣力的榮光；閣因為你歡喜阮，阮的角欲得著抬高。 |
| 89:18 | 阮的盾牌屬佇耶和華；阮的王屬佇以色列的聖者。 |
| 89:19 | 當時，你佇異象中吩咐你聖的百姓，講：我用幫助的力下佇彼個有權能者的身上；對百姓中揀者我高升伊。 |
| 89:20 | 我尋著我的奴僕大衛，用我的聖油抹伊。 |
| 89:21 | 我的手欲常常及伊佇啲；我的手骨亦欲堅固伊。 |
| 89:22 | 對敵𣍐會勒索伊；兇惡的人𣍐會苦楚伊。 |
| 89:23 | 我欲佇伊的面前拍碎伊的對敵，攻擊彼個怨恨伊的人。 |
| 89:24 | 總是我的信實及我的慈愛欲及伊佇啲；因為我的名，伊的角欲得著抬高。 |
| 89:25 | 我欲互伊的手伸到海，正手伸到諸個河。 |
| 89:26 | 伊欲稱呼我講：你是我的父，是我的上帝，是救我的石磐。 |
| 89:27 | 我亦欲設立伊做大子，做世上第一高的君王。 |
| 89:28 | 我欲為著伊保存我的慈愛，到永遠；我及伊所立的約的確無變換。 |
| 89:29 | 我亦欲保存伊的後裔到代代，互伊的寶座親像天的久。 |
| 89:30 | 設使伊的子孫放拺我的律法，無行我的法度； |
| 89:31 | 悖謬我的律例，無守我的誡命， |
| 89:32 | 我就欲用柺仔責罰𪜶的過失，用鞭責罰𪜶的罪惡。 |
| 89:33 | 總是我的確無將我的慈愛一盡對伊收回，亦的確無互我的信實廢無。 |
| 89:34 | 我的確無失我的約，亦無改換我的嘴所講的。 |
| 89:35 | 我一擺指家己的聖潔來咒誓：我決斷無對大衛講白賊！ |
| 89:36 | 伊的後裔欲傳到永遠；伊的寶座佇我的面前親像日的久長， |
| 89:37 | 亦親像月的永遠建立，閣親像天頂確實的干證。（細拉） |
| 89:38 | 總是你有受氣你的受抹油者，厭賤棄拺伊。 |
| 89:39 | 你已經厭惡及你的奴僕所立的約，將伊的冕旒蹧躂佇地裡。 |
| 89:40 | 你已經拆伊一切的籬笆，互伊的衛所變做拋荒的所在。 |
| 89:41 | 過路人攏搶提伊；伊成做隔壁國所凌辱者。 |
| 89:42 | 你互伊的對敵的正手抬高；互伊的仇讎攏歡喜。 |
| 89:43 | 你互伊的刀劍倒鋩，互伊佇交戰的時徛𣍐住， |
| 89:44 | 你互伊的榮顯無去，將伊的寶座捙倒佇地裡。 |
| 89:45 | 你減少伊青年的日子，閣互伊滿滿見誚。（細拉） |
| 89:46 | 耶和華啊，你欲偌久？家己囥密到永遠嗎？你的受氣親像火𤏸欲偌久啊？ |
| 89:47 | 求你記得我的時間怎樣許短少；你創造一切的世間人，互𪜶到許空虛啊！ |
| 89:48 | 甚麼人會長長活無見著死、會救伊的靈魂脫離陰間的權柄啊！（細拉） |
| 89:49 | 主啊，你前憑你的信實對大衛咒誓者許個慈愛今佇叨落？ |
| 89:50 | 主啊，求你記念你的奴僕所受的凌辱，記念我怎樣將一切強盛的百姓的凌辱存佇我的心內。 |
| 89:51 | 耶和華啊，你的對敵用此個凌辱，就是凌辱你受抹油者的徛跡。 |
| 89:52 | 著謳咾耶和華，到永遠。阿們！閣阿們！ |
