經上記著說:『人活著,不是單靠食物,乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本:台語和合本 -
42:1 | 〔可拉後裔教示的詩;交互樂官。〕上帝啊,我的心切切欣慕你,親像鹿切切欣慕溪水。 |
---|---|
42:2 | 我的心嘴乾欣慕上帝,就是活的上帝;我啥時會到上帝面前來見伊啊? |
42:3 | 我暝日用我的目屎準飯食;𪜶對我講無息:你的上帝佇叨落? |
42:4 | 我早前及眾人做陣去,導𪜶到上帝的厝,用歡喜謳咾的聲,大家守節。我追念諸個事,我的心極其悲傷。 |
42:5 | 我的心啊,你啥事鬱悴?啥事佇我的內面著急?你著向望上帝,因為伊的面向我來拯救我;所以我猶久欲謳咾伊。 |
42:6 | 我的上帝啊,我的心佇我的內面鬱悴,所以我對約但的地及黑門,亦對米薩的山記念你。 |
42:7 | 你的瀑布出聲,就深淵及深淵相叫應;你的波浪你的大湧攏淹密我。 |
42:8 | 總是耶和華日時欲施出伊的慈愛;暝時,伊互我唱歌來求賞賜我活命的上帝。 |
42:9 | 我欲對上帝──我的石磐講:你啥事𣍐記得我?我啥事因為對敵的壓迫憂悶來行啊? |
42:10 | 我的對敵譏刺我,親像拍碎我的骨頭,𪜶對我講無息:你的上帝佇叨落? |
42:11 | 我的心啊,你啥事鬱悴?啥事佇我的內面著急?你著向望上帝,因為我猶久欲謳咾伊。伊是我的面的榮光,亦是我的上帝。 |