經上記著說:『人活著,不是單靠食物,乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本:台語和合本 -
27:1 | 〔大衛的詩。〕耶和華是我的光,是我的拯救,我欲驚是誰?耶和華是我活命的氣力,我欲驚是誰? |
---|---|
27:2 | 許個做歹的人就是我的仇讎,我的對敵來攻擊我,欲食我的肉,彼時𪜶就著觸跋倒。 |
27:3 | 雖然有軍兵紮營欲攻擊我,我的心亦無驚惶;雖然興起刀兵攻擊我,我猶原自在。 |
27:4 | 有一項事,我曾對耶和華求,我猶原致意愛得著;就是一世人徛起耶和華的厝,看伊的榮光,數念伊的殿。 |
27:5 | 因為患難的日,伊欲暗靜保護我;佇伊的帳帷內,將我囥佇伊布棚蓋密的所在,舉起我佇石磐頂。 |
27:6 | 今我的頭殼得著抬起,卡高佇我四面的對敵。我欲佇伊的布棚獻歡喜的祭;我欲吟詩亦欲唱歌謳咾耶和華。 |
27:7 | 耶和華啊,我出聲求叫的時,求你聽;閣求你憐憫我,應我。 |
27:8 | 你曾講:恁著欣慕見我的面。彼時我的心對你講:耶和華啊,我欲欣慕見你的面。 |
27:9 | 呣通對我掩你的面。呣通受氣來趕你的奴僕,你平素是做我的幫助。救我的上帝啊,呣通放拺我,亦呣通離開我。 |
27:10 | 因為父母離開我,耶和華欲收留我。 |
27:11 | 耶和華啊,求你用你的道路指示我,因為我的對敵的緣故導我佇平坦的路。 |
27:12 | 呣通將我交互對敵,成𪜶的心願;因為濫糝干證的人,起來攻擊我,𪜶亦吐出兇惡的話。 |
27:13 | 我若呣信佇活人的地得著看見耶和華的恩惠,就的確絕望。 |
27:14 | 著聽候耶和華!著勇壯,你的心著堅固!實在著聽候耶和華! |