經上記著說:『人活著,不是單靠食物,乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本:台語和合本 -
31:1 | 〔大衛的詩,交互樂官。〕耶和華啊,我倚靠你;求你互我永永無見誚;照你的公義拯救我! |
---|---|
31:2 | 求你俯耳孔聽我,緊緊來救我!做我堅固的石磐,做拯救我的衛所! |
31:3 | 因為你是我的山巖,我的山寨;所以,求你因為你的名來引導我,指點我。 |
31:4 | 人暗靜張羅網欲網我,求你救我脫離,因為你是我的衛所。 |
31:5 | 我將我的靈魂交佇你的手;耶和華真實的上帝啊,你有救贖我。 |
31:6 | 我怨恨許個信奉虛假的人;獨獨我倚靠耶和華。 |
31:7 | 我因為你的慈愛欲歡喜快樂;因為你有看見我的艱苦,知我心神的艱難。 |
31:8 | 你未曾將我交佇對敵的手;你互我的腳徛佇開闊的所在。 |
31:9 | 耶和華啊,我佇患難中,求你憐憫我;我的目睭因為憂悶拍歹,我的心神我的身體亦是按呢。 |
31:10 | 我的生命因為憂苦來消無;我的年歲為著吐氣亦按呢。我的氣力因為我的罪惡來衰膦;我的骨頭亦枯焦。 |
31:11 | 我因為我一切的對敵成做凌辱,佇我的厝邊兜閣卡傷重;許個識我的人攏驚我,佇外面看見我的人走閃離開我。 |
31:12 | 我親像死人,互人𣍐記得,無人數念;我親像破碎的器具。 |
31:13 | 因為我聽見多多人的誹謗,四圍攏是驚惶;𪜶相及參詳攻擊我的時,就計謀欲害我的生命。 |
31:14 | 耶和華啊,我猶原倚靠你;我講:你是我的上帝。 |
31:15 | 我的遭遇佇你的手;求你救我脫離我的對敵的手以及窘迫我的人。 |
31:16 | 求你互你的面照光你的奴僕,照你的慈愛拯救我。 |
31:17 | 耶和華啊,求你互我無見誚,因為我有求叫你;求你互歹人見誚;互𪜶佇陰間靜寂寂。 |
31:18 | 願你互許個白賊的嘴變啞口;就是驕傲看輕,濫糝侮慢義人的。 |
31:19 | 敬畏你的人,你為著𪜶所積聚的恩惠,為著倚靠你的人,佇世間人的面前所施行的恩惠怎樣許大! |
31:20 | 你欲將𪜶囥佇你的面前隱密的所在,免致抵著人的計謀;你欲暗靜保守𪜶佇帳帷內,免受嘴舌的爭辯。 |
31:21 | 耶和華是應該謳咾者,因為伊佇堅固的城對我施出伊奇妙的慈愛。 |
31:22 | 論到我,我曾著急講:對你的目睭前,我受隔斷。總是,我求叫你的時,你猶原聽我懇求的聲。 |
31:23 | 耶和華聖的百姓啊,恁攏著疼伊!耶和華保守誠實的人,重重報應行驕傲的人。 |
31:24 | 見若向望耶和華的人,恁著壯膽,恁的心著堅固! |