台語聖經 | 社團法人台灣麥穗田使命協會

走到哪裡都有麥子

走出你的個人世界 WITH

走到哪裡都有麥子～

聯繫我們

聯繫資訊

新北市永和郵局238號信箱 (02)2926-5882 .0987-300-005 服務信箱：info@awheat.org 捐款支持

線上台語聖經

麥穗田首頁線上台語聖經

台語聖經

經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -

詩篇第119章

章節快速選擇 :

上下篇聖經查閱：約伯記箴言回到目錄

119:1	所行完全、遵趁耶和華律法者，此號人有福氣！
119:2	遵守伊干證的話，專心尋伊者，此號人有福氣！
119:3	𪜶無做不義的事，𪜶遵趁伊的道路。
119:4	你曾將你教示的話吩咐阮，是愛阮殷勤遵守。
119:5	願我的趨向定著，來守你的律例。
119:6	我對重你一切的誡命，就不致見誚。
119:7	我學習你公義的判斷，就欲用正直的心感謝你。
119:8	我欲守你的律例；求你呣通一盡放拺我！
119:9	少年人著用甚麼來清氣伊的所行？是著照你的話來細膩行！
119:10	我專心尋你；求你呣通互我迷路離開你的誡命。
119:11	我將你的言語囥佇我的心內，免得我得罪你。
119:12	耶和華啊，你是應該受謳咾者！求你將你的律例教示我！
119:13	你所講一切的判詞我用嘴唇報揚伊。
119:14	我歡喜你干證的路，親像歡喜一切的財物。
119:15	我欲靜靜想你教示的話，亦欲注重你的道路。
119:16	我欲佇你的律例中家己快樂；我無𣍐記得你的話。
119:17	求你用大恩款待你的奴僕，互我得著活，我就欲守你的話。
119:18	求你開我的目睭，互我看出你律法中的奇妙。
119:19	我佇地上是做寄腳者；求你呣通對我隱密你的誡命！
119:20	我的心爆裂，因為時常切切欣慕你的判詞。
119:21	你責備驕傲受咒詛的人，就是迷路離開你的誡命的人。
119:22	求你給我除去凌辱及看輕，因為我守你干證的話。
119:23	貴族坐啲濫糝議論我，若是你的奴僕靜靜想你的律例。
119:24	你干證的話是我所歡喜的，是我的謀士。
119:25	我的生命敆住佇土粉；求你照你的話拯救我活！
119:26	我講起我所行的路，你應我；求你將你的律例教示我！
119:27	求你互我明白你教示的路，我就靜靜想你的奇事。
119:28	我的心神因為憂苦來消溶；求你照你的話互我勇健！
119:29	求你互我離開奸詐的路，將你的律法恩賜我！
119:30	我有揀信實的路，將你的判詞下佇我的面前。
119:31	我戀慕你干證的話；耶和華啊，求你呣通互我見誚！
119:32	你開闊我的心的時，我就走佇你誡命的路。
119:33	耶和華啊，求你將你律例的路指示我，我欲徹底遵守！
119:34	求你互我智慧，我就守你的律法，閣欲專心執守。
119:35	求你互我行你誡命的路，因為此個路是我所歡喜的。
119:36	求你互我的心向你干證的話，無向不義的錢財。
119:37	求你互我的目睭越走無看虛假，閣互我佇你的路中來活。
119:38	你的奴僕敬畏你，求你為伊堅固你的話！
119:39	求你互我所驚的凌辱離開我，因為你的判詞是好。
119:40	我欣慕你教示的話；求你佇你的公義互我來活！
119:41	耶和華啊，願你照你的話，互你的慈愛，就是你的救恩，臨到我，
119:42	我就有話通應彼個凌辱我者，因為我倚靠你的話。
119:43	求你互真理的話無一盡離開我的嘴，因為我向望你的判斷。
119:44	我欲常常守你的律法，直到永遠。
119:45	我欲行佇寬闊的所在，因為我有講究你教示的話。
119:46	我亦欲佇君王的面前講論你干證的話，亦無致到見誚。
119:47	我欲佇你的誡命中家己快樂；諸個誡命平素是我所疼惜的。
119:48	我疼惜你的誡命，我欲對伊抬起手；你的律例我亦欲靜靜想伊。
119:49	求你記得對你的奴僕所應允的話，因為你曾互我有向望。
119:50	你的話將我救活；我佇患難中，對這得著安慰。
119:51	驕傲的人盡在侮慢我，總是我未曾偏離你的律法。
119:52	耶和華啊，我記念你對早以來的判詞，就家己得著安慰。
119:53	我因為棄拺你的律法的歹人，就大受氣，親像火𤏸。
119:54	我佇寄腳的厝，平時用你的律例做詩歌。
119:55	耶和華啊，我暝間記念你的名，守你的律法。
119:56	我得著按呢，是因為我守你教示的話。
119:57	耶和華是我的基業；我曾講：我欲守你的話。
119:58	我曾專心求你的恩；願你照你的話憐憫我！
119:59	我深深想我所行的路，就越轉腳向你干證的話。
119:60	我守你的誡命，趕緊無延延。
119:61	歹人的索縛纏我，總是我無𣍐記得你的律法。
119:62	我因為你公義的判斷，半暝欲起來感謝你。
119:63	見若敬畏你，及守你的教示的人，我及𪜶做伴。
119:64	耶和華啊，你的慈愛遍滿地面；求你將你的律例教示我！
119:65	耶和華啊，你曾好款待你的奴僕，是照你所講的話。
119:66	求你將好的聰明及智識教示我，因為我信你的誡命。
119:67	我未受苦以前有行迷路，總是我今守你的話。
119:68	你是好，所行亦是好；求你將你的律例教示我！
119:69	驕傲的人造作無影話攻擊我，總是我欲專心守你的教示。
119:70	𪜶的心鈍親像油包密，總是我歡喜你的律法。
119:71	我有受苦是做我的利益，因為欲互我學習你的律例。
119:72	你所講的律法是做我的利益，贏過千萬個金銀。
119:73	你的手創造我，成持我；求你互我智慧，通學習你的誡命！
119:74	敬畏你的人看見我就欲歡喜，因為佇你的話我有向望。
119:75	耶和華啊，我知你的判斷是公義；你互我受苦是對佇信實。
119:76	求你用你的慈愛安慰我，照你對你的奴僕所講的話。
119:77	願你的慈悲臨到我，互我活，因為你的律法是我所歡喜的。
119:78	願驕傲的人受見誚，因為𪜶無理由枉屈我；總是我欲靜靜想你的教示。
119:79	願敬畏你的人歸向我，𪜶就知你干證的話。
119:80	願我的心完全守你的律例，互我不致見誚。
119:81	我的心神欣慕你的救恩到昏去，總是佇你的話我有向望。
119:82	我因為向望你的話目睭花，講：你甚麼時欲安慰我？
119:83	因為我親像佇火薰中的皮袋，總是我無𣍐記得你的律例。
119:84	你的奴僕的日子有偌多啊？你欲底時審判窘迫我的人？
119:85	驕傲的人就是無趁你的律法者，掘陷坑欲害我。
119:86	你的誡命一盡誠實；𪜶無因端窘迫我，求你幫助我。
119:87	𪜶險險滅無我佇世間，總是我無放拺你的教示。
119:88	求你照你的慈愛互我活，我就欲守你的嘴干證的話。
119:89	耶和華啊，你的話安定佇天裡，直到永遠。
119:90	你的誠實存到萬代；你建立地，地就長長佇啲。
119:91	照你的定例，𪜶到今猶佇啲，因為萬物攏是你的差用，
119:92	我若呣是歡喜你的律法，就早早佇我的苦難中滅無啦！
119:93	我永永無𣍐記得你的教示，因為你用這互我活。
119:94	我是你的，求你救我，因為我尋你的教示。
119:95	歹人當等我，欲滅無我，總是我欲講究你干證的話。
119:96	我看所有的完全攏是有限，獨獨你的命令極其開闊。
119:97	我疼惜你的律法到怎樣啊！我通日靜靜想。
119:98	你的誡命常常及我佇啲，互我比我的對敵卡有智慧。
119:99	我比我攏總的先生卡通達，因為我靜靜想你干證的話。
119:100	我比老人卡明白，因為我守你的教示。
119:101	我禁我的腳一切的歹路無行，互我通守你的話。
119:102	我無偏離你的判斷，因為你有教示我。
119:103	你的話佇我的上徛到偌甜，佇我的嘴比蜜卡甜！
119:104	我對你的教示得著明白，所以我怨恨一切的邪路。
119:105	你的話做我腳前的燈，做我路上的光。
119:106	你公義的判斷，我曾咒誓欲遵守，我決斷按呢行。
119:107	我受苦到極；耶和華啊，求你照你的話互我活！
119:108	耶和華啊，求你鑒納我的嘴所歡喜獻的謳咾，閣將你的判詞教示我！
119:109	我的生命常常抵著危險，猶久我無𣍐記得你的律法。
119:110	歹人設羅網欲害我，總是我無偏離你的教示。
119:111	我將你干證的話做永遠的基業，因為這是我心內所歡喜的。
119:112	我互我的心專向你的律例，永遠遵趁，直到路尾。
119:113	二樣心的人是我所痛恨；獨獨你的律法是我所疼惜。
119:114	你是我閃匿的所在，閣是我的盾牌；我佇你的話有向望。
119:115	做歹的人啊，恁著離開我！互我通守我的上帝的誡命。
119:116	求你照你的話扶持我，互我活，亦無互我因為所向望的來見誚。
119:117	求你扶持我，我就得救，我欲常常對重你的律例。
119:118	見若行差路離開你的律例的人，你看輕𪜶；因為𪜶的詭詐是虛假。
119:119	世間的歹人，你攏給𪜶除去，親像渣滓；因為按呢我疼惜你干證的話。
119:120	我因為驚畏你，我的肉就惙；你的判斷亦互我驚惶。
119:121	我秉公行義，求你呣通將我放互壓制我的人！
119:122	求你保認你的奴僕，通得著好境遇，莫得互驕傲的人壓制我！
119:123	我因為向望你的救恩，及你公義的話致到目睭花。
119:124	求你照你的慈愛款待你的奴僕，將你的律例教示我。
119:125	我是你的奴僕，求你互我智慧，互我會知你干證的話。
119:126	現今當是耶和華行代誌的時，因為人廢無你的律法。
119:127	所以，我疼惜你的誡命贏過金，亦贏過好金。
119:128	所以你一切的教示，萬事我攏掠做正直；閣我怨恨一切的邪路。
119:129	你干證的話是奇妙，所以我的心謹慎執守。
119:130	你的話一下開拆就發出光，互戇人通達。
119:131	我開嘴直直喘，因為我切切欣慕你的誡命。
119:132	求你越轉向我，憐憫我，親像你平常款待許個敬愛你的名的人。
119:133	求你用你的話互我的腳步穩當，莫容允甚麼罪惡管轄我。
119:134	求你救贖我脫離人的壓制，我就欲守你的教示。
119:135	願你互你的面的光照你的奴僕，閣將你的律例教示我。
119:136	我的目屎親像溪水啲流，因為𪜶無守你的律法。
119:137	耶和華，你是公義的；你的判斷亦是正直的！
119:138	你所命令干證的話是照公義極其誠實。
119:139	我的心熱，親像火燒滅我，因為我的對敵𣍐記得你的話。
119:140	你的話鍛煉到真精，所以你的奴僕真意愛。
119:141	我卑微，互人看輕，總是我無𣍐記得你的教示。
119:142	你的公義是永遠的公義；你的律法是真實。
119:143	我抵著患難憂苦，總是你的誡命是我所歡喜的。
119:144	你干證的話永遠是公義；求你互我智慧，我就會活。
119:145	耶和華啊，我專心求叫你；求你應我，我欲謹慎守你的律例。
119:146	我對你求叫，求你救我！我就欲守你干證的話。
119:147	我趁天未光求叫你；佇你的話我有向望。
119:148	暝時更猶未深，我的目睭已經nih開，因為欲靜靜想你的話。
119:149	求你照你的慈愛聽我的聲；耶和華啊，求你將你的判斷互我會活！
119:150	慣練行歹的人迫倚來；𪜶離開你的律法遠遠。
119:151	耶和華啊，你是近近；你的誡命攏是真實！
119:152	我講究你干證的話，早早已經知是你立定到永遠的。
119:153	求你看顧我的苦難，來牽救我，因為我無𣍐記得你的律法。
119:154	求你給我伸冤，救贖我，照你的話互我活。
119:155	救恩離開歹人遠遠，因為𪜶無尋你的律例。
119:156	耶和華啊，你的慈悲是大；求你照你的判斷互我活。
119:157	窘迫我的，抵敵我的，真多，總是我無偏離你干證的話。
119:158	我看見奸惡的人就真厭惡，因為𪜶無守你的話。
119:159	你看我怎樣疼惜你的教示！耶和華啊，求你照你的慈愛互我活！
119:160	你的話的總根頭是真實；你一切公義的判斷是永遠佇啲。
119:161	貴族無因端窘迫我，總是我的心驚畏你的話。
119:162	我歡喜你的話，親像人得著多多刣贏的物。
119:163	白賊話是我所痛恨所厭賤的；你的律法是我所疼惜的。
119:164	我因為你公義的判斷逐日七擺謳咾你。
119:165	疼惜你的律法的人有大平安，無一項會纏絆𪜶的腳。
119:166	耶和華啊，我有啲向望你的救恩，有行你的誡命。
119:167	我的心有守你干證的話；諸個話我盡在意愛。
119:168	我有守你的教示及你干證的話，因為我一切所行的攏佇你的面前。
119:169	耶和華啊，願我求叫的聲透到你的面前，求你照你的話賞賜我智慧。
119:170	願我懇求的話到你的面前，求你照你的話牽救我。
119:171	願我的嘴唇發出謳咾的話，因為你將你的律例教示我。
119:172	願我的舌唱歌謳咾你的話，因為你一切的誡命攏是公義。
119:173	願你伸手幫助我，因為我有揀你的教示。
119:174	耶和華啊，我切切欣慕你的救恩！你的律法亦是我所歡喜的。
119:175	願我活啲，我的神魂就欲謳咾你！願你的判斷幫助我！
119:176	我迷路親像拍呣見的羊，求你尋你的奴僕，因為我無𣍐記得你的誡命。

- 本章節結束 -

上一章下一章