走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 10:1 | 耶穌就叫伊十二個學生來，互𪜶有制壓邪神的權，來趕逐𪜶，續醫好逐樣的症頭逐樣的病疼。 |
|---|---|
| 10:2 | 十二使徒的名就是諸個：頭一個西門（叫做彼得），及伊的兄弟安得烈，西庇太的子雅各及伊的兄弟約翰， |
| 10:3 | 腓力及巴多羅買，多馬及抽餉的馬太，亞勒腓的子雅各，及達太， |
| 10:4 | 加拿尼的西門，及加略人猶大就是賣耶穌的。 |
| 10:5 | 耶穌差此十二人，續吩咐𪜶講：「外邦的路，莫得行；撒瑪利亞人的城，莫得入； |
| 10:6 | 卡好著去就近以色列家失落的羊， |
| 10:7 | 行的時著傳，講『天國近啦！』 |
| 10:8 | 醫好有病的，互死的復活，互癩的清氣，趕鬼。恁白白得著，著白白互人。 |
| 10:9 | 恁的腰肚內，攏呣通有金銀銅； |
| 10:10 | 路裡亦莫得有褡褳；莫得二領衫，莫得鞋，莫得枴仔。因為做工人堪得得著伊的飲食。 |
| 10:11 | 恁所入的無論甚麼城，甚麼鄉里，著探聽其中是誰會堪得，就𫢶佇遐，到離開的時。 |
| 10:12 | 入彼個厝，著給伊請安。 |
| 10:13 | 彼個厝若會堪得，就互恁的平安到佇伊，若𣍐堪得，就互恁的平安歸佇恁。 |
| 10:14 | 見若呣接納恁、呣聽恁的話的，出彼個厝，彼個城的時，著拂去恁腳裡的土粉。 |
| 10:15 | 我實在給恁講，當審判的日，所多瑪及蛾摩拉的地方，比彼個城猶卡快擔當！」 |
| 10:16 | 「今我差恁，親像羊佇豺狼的中間；所以恁著智識親像蛇，純良親像鴿仔。 |
| 10:17 | 總是著持防人；因為𪜶欲將恁交互公會，亦欲佇𪜶的會堂鞭拍恁， |
| 10:18 | 閣恁亦欲為著我的緣故受拖到總督及君王的面前，來做干證佇𪜶及外邦人。 |
| 10:19 | 若是恁受送交的時，莫得掛慮欲怎樣講，抑是講甚麼話。因為所著講的，欲佇彼時賞賜恁； |
| 10:20 | 因為呣是恁家己講，是恁的父的神𫢶佇恁啲講。 |
| 10:21 | 兄弟欲將兄弟送交去死，父款待子亦按呢；子兒欲起來攻擊父母，互𪜶死； |
| 10:22 | 亦恁因為我的名欲互眾人怨恨。獨獨吞愞到路尾的伊欲得著救。 |
| 10:23 | 佇此個城窘逐恁，著走到彼城。我實在給恁講，以色列諸個城，恁行未，人子就到。 |
| 10:24 | 學生𣍐𨃟過先生；奴僕𣍐𨃟過主人。 |
| 10:25 | 學生親像先生，奴僕親像主人，就夠額。人既然叫家主做別西卜，何況叫伊家內的人？」 |
| 10:26 | 「所以，莫得驚𪜶；因為無有蓋密後來無露出的事，亦無有隱密後來無互人知的。 |
| 10:27 | 我佇暗中給恁講的，恁著佇光明的所在講出；俯佇耳孔給恁講的，著佇厝頂傳伊。 |
| 10:28 | 許個害死身軀、𣍐害死靈魂的，莫得驚𪜶；獨獨彼個會滅靈魂及身軀佇地獄的，卡著驚。 |
| 10:29 | 二隻雀鳥仔豈呣是賣一分銀嗎？若呣是恁的父有准，一隻亦𣍐磕落地； |
| 10:30 | 就恁的頭毛亦攏過算。 |
| 10:31 | 所以，恁莫得驚，恁比多多雀鳥仔卡貴氣！」 |
| 10:32 | 「所以見若佇人的面前認我的，我亦佇我佇天裡的父的面前欲認伊； |
| 10:33 | 見若佇人的面前呣認我的，我亦佇我佇天裡的父的面前欲呣認伊。」 |
| 10:34 | 「莫得拍算我來是欲互地上和平；我來呣是欲互伊和平，就是㧒㧒落刀劍。 |
| 10:35 | 因為我來是互子及伊的老父絕情，查某子及伊的老母，媳婦及伊的乾家，亦欲按呢。 |
| 10:36 | 閣人的對敵就是伊家己家內的人。 |
| 10:37 | 「疼父母卡過頭佇疼我的，𣍐堪得佇我；疼子查某子卡過頭佇疼我的，𣍐堪得佇我； |
| 10:38 | 呣背家己的十字架來隨佇我的後面的，亦𣍐堪得佇我。 |
| 10:39 | 得著伊的生命的人，欲失落伊；為著我失落伊的生命的人，欲得著伊。」 |
| 10:40 | 「接納恁的就是接納我；接納我的就是接納差我的。 |
| 10:41 | 為著先知的名來接納先知的，欲得著先知的賞；為著義人的名來接納義人的，欲得著義人的賞。 |
| 10:42 | 見若為著學生的名，干單用一杯冷水互諸個細子的一個飲的，我實在給恁講，伊決斷𣍐失落伊的賞。」 |
