走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 24:1 | 耶穌出殿，抵啲行，伊的學生就近伊，用殿堂許個厝報伊看。 |
|---|---|
| 24:2 | 若是伊應講：「恁無看見諸個嗎？我實在給恁講，佇遮欲無一塊石留佇石頂，也無捙落去。」 |
| 24:3 | 耶穌坐佇橄欖山的時，學生私奇就近伊講：「請給阮講，底時有諸個代誌？也你閣來，及世界的結局有甚麼兆頭？」 |
| 24:4 | 耶穌應講：「著謹慎，莫得互人迷惑。 |
| 24:5 | 因為欲有多多人佇我的名來，講：『我是基督』，來迷惑多多人。 |
| 24:6 | 恁欲聽見交戰及交戰的風聲，謹慎莫得驚；因為諸個的確有，總是末期猶未到。 |
| 24:7 | 因為百姓欲起來攻擊百姓，國欲起來攻擊國；多多所在欲有飢荒、地動。 |
| 24:8 | 諸個攏是苦痛的起頭。 |
| 24:9 | 彼時，人欲交付恁佇患難，刣死恁；恁因為我的名欲互萬邦怨恨。 |
| 24:10 | 也彼時，多多人欲受塞礙相解送，相怨恨； |
| 24:11 | 閣有多多假先知欲起來，迷惑多多人。 |
| 24:12 | 因為不法大大加添，多多人的疼漸漸冷淡。 |
| 24:13 | 獨獨吞愞到路尾的，伊會得著救。 |
| 24:14 | 此個天國的福音欲傳到通天下，做干證佇萬邦，彼時末期就到。」 |
| 24:15 | 「所以恁看見早託先知但以理所講『彼個殘害可惡的』徛佇聖的所在（讀的人著曉悟）。 |
| 24:16 | 彼時，佇猶太的，著走去山裡； |
| 24:17 | 佇厝頂的，莫得落來提伊家內的物； |
| 24:18 | 佇園裡的，莫得倒去撒伊的衫。 |
| 24:19 | 當許個日，有娠孕及互嬰仔食奶的婦仁人有災禍啊！ |
| 24:20 | 恁著祈禱，免得恁的逃走，佇冬天時抑是安息日。 |
| 24:21 | 因為彼時欲有大患難，對世間的起頭到今，未曾有按呢，後來也決斷無。 |
| 24:22 | 若無減少許個日，就凡有肉體的無一個得救；獨獨為著揀的百姓，許個日欲減少。 |
| 24:23 | 彼時，若有人給恁講：『你看，基督佇遮』，抑是講：『佇遐』，恁莫得信！ |
| 24:24 | 因為欲有假基督，假先知起來，行大的神蹟及兆頭，欲是會，連揀的百姓也迷惑伊。 |
| 24:25 | 我已經代先給恁講。 |
| 24:26 | 所以人若給恁講：『你看，伊是佇曠野』，恁莫得出去！抑是講：『你看，伊是佇密厝』，恁莫得信！ |
| 24:27 | 因為親像閃爁對東勢啲閃，爁到西勢。人子的閣來也欲按呢。 |
| 24:28 | 身屍若佇遐，鷹鳥也欲聚集佇遐。」 |
| 24:29 | 「抵抵諸個日的患難了後，日欲黑暗，月無出光，星對天磕落，天象振動。 |
| 24:30 | 彼時，人子的兆頭欲出現佇天裡，佇地裡諸個族類攏欲啼哭。也欲看見人子，用權能、及大榮光，坐天的雲臨到。 |
| 24:31 | 伊欲差伊的天使，用號頭響亮的聲，𪜶欲對四方，此旁的天邊到彼旁的天邊，聚集伊所揀的百姓。」 |
| 24:32 | 「恁著對無花果樹取譬喻；當伊枝軟葉發的時，就知夏天近啦。 |
| 24:33 | 按呢，恁看攏總諸個事，就知已經近，到門口啦。 |
| 24:34 | 我實在給恁講，此世代決斷未過去，到諸個代誌攏成。 |
| 24:35 | 天及地欲廢無，我的話𣍐廢無。」 |
| 24:36 | 「若是論彼日，彼時，人呣知，天使也呣知，子也呣知，獨獨父知若定。 |
| 24:37 | 閣親像挪亞的日，人子的閣來也欲按呢。 |
| 24:38 | 因為大水的代先許個日，人啲飲食嫁娶，到挪亞入大船的日； |
| 24:39 | 𪜶竟然呣知，到大水到一盡滅𪜶。人子的閣來也欲按呢。 |
| 24:40 | 彼時，欲有二人佇園裡，一個取去，一個放啲。 |
| 24:41 | 二個婦仁人挨磨，一個取去，一個放啲。 |
| 24:42 | 所以著張持，因為恁呣知恁的主甚麼日欲來。 |
| 24:43 | 家主若知賊甚麼更欲到，伊就張持無容允人挖空伊的厝；這是恁所知。 |
| 24:44 | 所以，恁亦著備辦便，因為恁無拍算的時，人子來啦。」 |
| 24:45 | 「是誰是盡忠智慧的奴僕，主人所設立，來管伊家內的人，通照時分米糧互𪜶？ |
| 24:46 | 主人來，抵著伊按呢行，彼個奴僕有福氣。 |
| 24:47 | 我實在給恁講，主人欲設立伊來管伊一切所有的。 |
| 24:48 | 獨獨彼個歹的奴僕若心內講：『我的主人啲延延』， |
| 24:49 | 就拍許個及伊同做奴僕的，閣及醉漢相及飲食。 |
| 24:50 | 就佇無派批的日，呣知的時，彼個奴僕的主人欲到， |
| 24:51 | 重重刑罰伊，處置伊及假好的人平等；佇遐欲有啼哭咬牙切齒。」 |
