走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 21:1 | 𪜶行近耶路撒冷，到伯法其及橄欖山的時。 |
|---|---|
| 21:2 | 耶穌差二個學生，給𪜶講：「恁去對面的鄉社，連鞭會抵著一隻驢縛啲，有驢仔及伊佇啲；解開，牽伊來我遮。 |
| 21:3 | 若有人給恁講甚麼，就著講：『主欠用伊。』伊連鞭欲送伊來。 |
| 21:4 | 此個事成是欲應驗早託先知所講的，講： |
| 21:5 | 著給郇的查某子講：你的王來就近你，溫柔，閣騎驢，及驢所生的驢仔。」 |
| 21:6 | 學生去照耶穌所吩咐𪜶的去行， |
| 21:7 | 牽驢及驢仔來，將家己的衫舒佇𪜶頂面，耶穌就上去騎。 |
| 21:8 | 眾人中卡多將家己的衫舖佇路裡，有的剉樹枝舖佇路裡。 |
| 21:9 | 前行後隨的眾人喝講：大衛的後裔和散那！佇主的名來的得著謳咾！佇至高的和散那！ |
| 21:10 | 伊入耶路撒冷，通城搖泏，講：「此個是誰？」 |
| 21:11 | 眾人講：「此個是先知耶穌，對加利利的拿撒勒來的。」 |
| 21:12 | 耶穌入上帝的殿，趕出殿內一切買賣的人，捙倒換錢的人的桌，及賣鴿仔的人的椅， |
| 21:13 | 給𪜶講：「有記載講：我的厝欲稱做祈禱的厝，若是恁諸個互伊做賊巢。」 |
| 21:14 | 睛暝的、跛腳的佇殿裡就近耶穌，伊就醫好𪜶。 |
| 21:15 | 獨獨諸個祭司頭及經學士看見伊所行的奇事，閣看見囝仔佇殿裡喝講：「大衛的後裔和散那！」就受氣，給伊講：「𪜶啲講的，你聽見無？」 |
| 21:16 | 耶穌給𪜶講：「有。恁豈呣曾讀著彼句，講『對囝仔及食奶者的嘴，你互謳咾的話齊備』嗎？」 |
| 21:17 | 就離開𪜶，出城到伯大尼，佇遐歇暝。 |
| 21:18 | 隔早起，倒來城裡的時，耶穌枵， |
| 21:19 | 看見路邊一欉無花果樹，就倚近去，挽攏無，只有葉若定，就給樹講：「今了後，你永永無閣結果子。」彼欉無花果樹連鞭枯焦。 |
| 21:20 | 學生看了，就奇怪講：「無花果樹怎樣連鞭枯焦？」 |
| 21:21 | 耶穌應講：「我實在給恁講，恁若有信無僥疑，呣若此號行佇無花果樹的事恁會行，就若對此個山講：『著徙去㧒落海！』亦欲成。 |
| 21:22 | 閣祈禱的時，見若恁所求的，信就得著。」 |
| 21:23 | 耶穌入殿，教示人的時，諸個祭司頭及百姓的長老就近伊講：「你用甚麼權行諸個事？閣是誰互你此個權？」 |
| 21:24 | 耶穌應講：「我亦有一句話欲問恁，恁若給我講，我才欲給恁講我用甚麼權行諸個事。 |
| 21:25 | 約翰的洗禮是對叨落來？是對天？抑是對人？」𪜶私奇議論講：「若講『對天』，伊欲給咱講：『按呢，恁啥事呣信伊？』 |
| 21:26 | 若講『對人』，咱又驚百姓，𪜶攏掠約翰做先知。」 |
| 21:27 | 就應耶穌講：「阮呣知。」伊就給𪜶講：「我亦無欲給恁講我是用甚麼權行諸個事，總是恁拍算怎樣？」 |
| 21:28 | 「人有二個子。就近彼個頭一個講：『子啊，今仔日去葡萄園做工。』 |
| 21:29 | 應講：『我呣』，後來反悔，就去。 |
| 21:30 | 閣就近第二個亦按呢講。應講：『主啊，我欲』，就竟然無去。 |
| 21:31 | 此二個叨落一個行老父的意思啊？」𪜶講：「頭一個。」耶穌給𪜶講：「我實在給恁講，諸個抽餉的及娼妓代先恁入上帝的國。 |
| 21:32 | 因為約翰佇義的路就近恁，恁無信伊；抽餉的及娼妓就信伊，閣恁看了亦無反悔去信伊。」 |
| 21:33 | 「閣聽一個譬喻：有一個家主栽一園葡萄，用籬笆圍伊，內面開酒窟，起一個守更樓租互佃戶，就去別所在。 |
| 21:34 | 收果子時欲到，就差伊的奴僕就近佃戶收伊的果子。 |
| 21:35 | 佃戶掠伊的奴僕，一個拍，一個刣，一個用石頭擲。 |
| 21:36 | 閣差別個奴僕，比前卡多；𪜶猶原按呢款待𪜶。 |
| 21:37 | 後來差伊的子就近𪜶，想講：『𪜶欲尊敬我的子。』 |
| 21:38 | 若是佃戶看見彼個子，就相及講：『此個是伊的後嗣。來，給伊刣死，通得伊的業。』 |
| 21:39 | 就掠伊，捙伊出園外，害死伊。 |
| 21:40 | 今園主若到欲怎樣來辦諸個佃戶？」 |
| 21:41 | 𪜶給伊講：「伊欲用惡報來滅諸個惡人，將葡萄園租別個佃戶，就是照時納果子的。」 |
| 21:42 | 耶穌對𪜶講：「經裡所記載：師傅所棄拺的石成做厝角頭的石。這是主所成的，咱的目睭看做奇怪。恁豈未讀嗎？ |
| 21:43 | 所以我給恁講，上帝的國欲對恁搶去，來賞賜結伊的果子的百姓。 |
| 21:44 | 閣跋倒佇此塊石頂的，啲欲破糊糊；互此塊石壓佇伊頂面的，欲幼末末。」 |
| 21:45 | 諸個祭司頭及法利賽人聽見伊的譬喻，知伊所講的是指𪜶。 |
| 21:46 | 就愛欲掠伊，若是驚眾人，因為眾人掠伊做先知。 |
