走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 25:1 | 「彼時，天國欲比並十個在室女，抬𪜶的燈，出去迎接新子婿。 |
|---|---|
| 25:2 | 其中五個戇的，五個智識的， |
| 25:3 | 戇的抬𪜶的燈，無另外帶油； |
| 25:4 | 獨獨智識的，抬𪜶的燈另外帶油佇𪜶的器具內。 |
| 25:5 | 新子婿延延，就攏盹瞌睡啲睏。 |
| 25:6 | 半暝有大聲叫講：『新子婿來啦，恁出來接伊！』 |
| 25:7 | 彼時，諸個在室女攏起來修整𪜶的燈。 |
| 25:8 | 戇的給智識的講：『請將恁的油分阮，因為阮的燈欲熄啦。』 |
| 25:9 | 智識的應講：『驚了恁阮攏無夠；卡好去對賣的人家己買。』 |
| 25:10 | 去買的時，新子婿到。許個便的，及伊入婚姻的筵桌，門就關。 |
| 25:11 | 然後其餘的在室女亦來，講：『主啊，主啊，給阮開！』 |
| 25:12 | 若是伊應講：『我實在給恁講：，我呣識恁。』 |
| 25:13 | 所以，著張持，因為恁呣知，彼個日，彼個時。」 |
| 25:14 | 「因為親像一人欲去外國，就召伊家己的奴僕，將所有的交代𪜶； |
| 25:15 | 一個互伊銀五千，一個互伊二千，一個互伊一千，各照𪜶的才調，就去外國。 |
| 25:16 | 領五千的隨時去做生理，閣趁五千。 |
| 25:17 | 領二千的亦是按呢閣趁二千。 |
| 25:18 | 獨獨彼個領一千的去就掘地，來囥密伊的主人的銀。 |
| 25:19 | 過久久，諸個奴僕的主人到，及𪜶算數。 |
| 25:20 | 領五千的來閣帶五千，講：『主啊，你交代我五千。你看，我有閣趁五千。』 |
| 25:21 | 伊的主人給伊講：『好啊，好閣盡忠的奴僕，你佇少的已經盡忠，我欲設立你來管多的；通入你的主人的快樂。』 |
| 25:22 | 領二千的亦來，講：『主啊，你交代我二千。你看，我有閣趁二千。』 |
| 25:23 | 伊的主人給伊講：『好啊，好閣盡忠的奴僕，你佇少的已經盡忠，我欲設立你來管多的；通入你的主人的快樂。』 |
| 25:24 | 領一千的亦來，講：『主啊，我知你是嚴轄的人，未撒的所在就欲收割，未分散的所在就欲拾做堆， |
| 25:25 | 所以我驚，就將你一千銀去埋佇地裡。今你的原物還你。』 |
| 25:26 | 伊的主人就應伊講：『歹閣貧憚的奴僕啊，你既然知我無撒的所在就欲收割，未分散的所在就欲拾做堆， |
| 25:27 | 就著將我的銀下佇錢店，我來的時，通得著我的本銀及利息。 |
| 25:28 | 所以著對伊提彼一千來，互彼個有十千的。 |
| 25:29 | 因為見若有的，欲互伊，互伊有剩；無的，連伊所有的亦欲提伊。 |
| 25:30 | 亦彼個無利益的奴僕趕伊佇外面黑暗的所在；佇遐欲有啼哭咬牙切齒。』」 |
| 25:31 | 「當人子佇伊的榮光，及攏總的天使來的時，伊欲坐伊榮光的座位。 |
| 25:32 | 聚集萬邦佇伊的面前。伊就欲分別𪜶，親像牧者分別綿羊離開山羊， |
| 25:33 | 將綿羊下佇伊的正旁，山羊下佇伊的倒旁。 |
| 25:34 | 彼時王欲給正旁的講：『恁對我的父得著恩典的，進前來承接國，就是對創造世間以來給恁備辦的； |
| 25:35 | 因為我枵，恁曾互我食，我嘴乾，恁互我飲；我出外，恁互我住；我褪腹裼，恁互我穿； |
| 25:36 | 我破病，恁看顧我；我佇監裡，你來尋我。』 |
| 25:37 | 彼時義人欲應伊講：『主啊，阮甚麼時看見你枵，來互你食，嘴乾，來互你飲？ |
| 25:38 | 甚麼時看見你出外，來互你住，褪腹裼，來互你穿？ |
| 25:39 | 甚麼時看見你破病，抑是佇監裡，來尋你？』 |
| 25:40 | 王欲應伊講：『我實在給恁講，恁既然行伊佇我的兄弟至微細的的一個，就是行伊佇我。』 |
| 25:41 | 閣欲給倒旁的講：『恁受咒詛的，著離開我！入永遠的火就是為著魔鬼及伊諸個使者所備辦的！ |
| 25:42 | 因為我枵，恁呣曾互我食，我嘴乾，恁呣曾互我飲； |
| 25:43 | 我出外，恁呣曾互我住；我褪腹裼，恁呣曾互我穿；我破病，及佇監裡，恁呣曾看顧我。』 |
| 25:44 | 𪜶亦欲應講：『主啊，阮甚麼時看見你枵，抑是嘴乾，抑是出外，抑是褪腹裼，抑是破病，抑是佇監裡，來無服事你啊？』 |
| 25:45 | 伊就欲應伊講：『我實在給恁講，恁既然無行伊佇諸個至微細者的一個，就是無行伊佇我。』 |
| 25:46 | 諸個人欲去入永遠的刑罰；若是義的人入永遠活。」 |
