走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 26:1 | 耶穌講諸個話息，就給伊的學生講： |
|---|---|
| 26:2 | 「恁知，過二日𨃟過節就到，人子抵著解送，去釘十字架。」 |
| 26:3 | 彼時許個祭司頭及百姓的長老聚集佇祭司頭名該亞法的院。 |
| 26:4 | 相及參詳用詭譎的計掠耶穌，來刣伊。 |
| 26:5 | 總是講：「當節期呣通，驚了百姓的中間有擾亂。」 |
| 26:6 | 耶穌佇伯大尼癩西門的厝， |
| 26:7 | 有婦仁人帶玉瓶，內面貯極貴氣的香油就近伊，當伊坐桌的時，傾佇伊頭殼頂。 |
| 26:8 | 學生看見就受氣，講：「按呢破費有啥路用！ |
| 26:9 | 因為此個油會賣得多多銀，來互喪鄉人。」 |
| 26:10 | 耶穌知，就給𪜶講：「恁啥事刁難此個婦仁人啊？因為伊所行來款待我的是好事。 |
| 26:11 | 因為常常有喪鄉人及恁佇啲；若是我無常常及恁佇啲。 |
| 26:12 | 因為伊倒此個油佇我身軀，就是備辦我埋葬來行的。 |
| 26:13 | 我實在給恁講，普天下，無論甚麼所在傳此個福音，也欲講起此個婦仁人所行，來紀念伊。」 |
| 26:14 | 彼時，十二個學生一個名做加略人猶大，去見許個祭司頭，講： |
| 26:15 | 「恁欲互我偌多？我欲將伊交互恁。」𪜶就及伊約互伊銀三十。 |
| 26:16 | 對彼時，伊尋機會將耶穌交互𪜶。 |
| 26:17 | 除酵節的頭一日，學生就近耶穌講：「愛阮佇甚麼所在給你備辦食𨃟過節？」 |
| 26:18 | 伊講：「恁入城，尋某人，給伊講：『先生講：我的時近啦，我及我的學生守𨃟過節佇你兜。』」 |
| 26:19 | 學生照耶穌所吩咐的去行，就備辦𨃟過節。 |
| 26:20 | 到日暗，耶穌及十二個學生坐桌。 |
| 26:21 | 食的時，耶穌講：「我實在給恁講，恁中間一人欲賣我。」 |
| 26:22 | 眾人真憂悶，一個一個給伊講：「主啊，總無是我哦？」 |
| 26:23 | 伊應講：「及我伸手佇盤裡者，彼個欲賣我。 |
| 26:24 | 人子倒去，照所記載指伊的話；若是賣人子的有災禍啊！彼人無出世卡好。」 |
| 26:25 | 賣伊的猶大講：「拉比，總無是我哦？」給伊講：「你已經講啦。」 |
| 26:26 | 𪜶啲食的時，耶穌提餅，祝謝，擘破，分互學生，講：「提去食，此個是我的身軀」； |
| 26:27 | 閣捧杯，祝謝，互𪜶，講：「恁攏著飲伊； |
| 26:28 | 此個是我的血就是盟約的血，為著多多人來流出的，致到罪得著赦免。 |
| 26:29 | 若是我給恁講，今了後，我無飲此個葡萄的汁。聽候彼日我及恁飲彼個新的佇我的父的國。」 |
| 26:30 | 已經吟詩，就出來去橄欖山。 |
| 26:31 | 彼時，耶穌給𪜶講：「今暝，恁攏欲為著我來受塞礙。因為有記載講：我欲拍牧者，就羊群四散。 |
| 26:32 | 若是我復活了後，欲代先恁去加利利。」 |
| 26:33 | 彼得應伊講：「眾人雖然為著你來受塞礙，也我永永無受塞礙。」 |
| 26:34 | 耶穌給伊講：「我實在給你講，今暝雞猶未啼，你欲三擺呣認我。」 |
| 26:35 | 彼得給伊講：「我就若著及你死，也決斷無呣認你。」眾學生也攏是按呢講。 |
| 26:36 | 耶穌及𪜶到一所在，名客西馬尼，給伊的學生講：「恁諸個坐遮，聽候我去遐祈禱。」 |
| 26:37 | 才導彼得及西庇太二個子相及去，就憂悶，慘慼， |
| 26:38 | 給𪜶講：「我的心真憂悶，到欲死；恁住遮及我警醒。」 |
| 26:39 | 略略仔進前，面仆佇地裡，祈禱講：「我的父啊，若會做得，著互此個杯離開我。總是，呣是照我所愛，是照你所愛。」 |
| 26:40 | 就來學生遐，看見𪜶徛啲睏，給彼得講：「按怎樣？恁𣍐會及我警醒半時久啊？ |
| 26:41 | 著警醒著祈禱，免得入佇迷惑。心神甘願，若是肉體軟茈。」 |
| 26:42 | 第二擺閣去祈禱講：「我的父啊，此個杯若𣍐得離開我，的確著我飲伊，就願你的旨意得成。」 |
| 26:43 | 閣再來，看見𪜶又啲睏，因為𪜶的目睭澀。 |
| 26:44 | 離開𪜶閣去。第三擺祈禱，也是講許個話。 |
| 26:45 | 彼霎閣就近學生，給𪜶講：「今通睏來安息啦！時近啦，人子受賣佇罪人的手。 |
| 26:46 | 起來！相及行。賣我的人近啦！」 |
| 26:47 | 猶啲講的時，忽然十二個學生的一個猶大來，也有歸陣人抬刀及槌仔，對諸個祭司頭及百姓的長老遐相及來。 |
| 26:48 | 賣伊的曾及𪜶套暗號，講：「我給伊唚的彼人就是。恁通掠伊。」 |
| 26:49 | 即時就近耶穌，講：「拉比，平安」，就直直給伊唚。 |
| 26:50 | 耶穌給伊講：「朋友啊，你欲來做的，就做。」許個人就進前，起手掠耶穌。 |
| 26:51 | 忽然有及耶穌佇啲的一人伸手拔刀，刣祭司頭的奴僕，削去伊一個耳仔。 |
| 26:52 | 耶穌就給伊講：「收你的刀入原位！因為凡若抬刀的，欲對刀死。 |
| 26:53 | 抑是你拍算我𣍐會求我的父就伊佇此霎欲給我差十二營卡加的天使嗎？ |
| 26:54 | 若按呢，就聖經所講，此個代誌的確有的怎樣會應驗啊？」 |
| 26:55 | 彼時耶穌給𪜶許個人講：「恁抬刀及槌仔出來掠我，親像欲掠賊嗎？我日日坐佇殿內教示人，也恁無掠我。 |
| 26:56 | 總是此個事攏成，是欲應驗先知所記載的。」彼時學生攏離開伊走。 |
| 26:57 | 掠耶穌的帶伊到祭司頭該亞法的所在；佇遐許個經學士及長老已經聚集。 |
| 26:58 | 彼得遠遠隨伊到祭司頭的院，入內面及許個差役相及坐，欲看彼個結局。 |
| 26:59 | 諸個祭司頭及全公會尋濫糝的干證攻擊耶穌，愛互伊死。 |
| 26:60 | 雖然多多濫糝干證的來，也無得著。後來有二個到， |
| 26:61 | 講：「此人曾講：『我會毀壞上帝的殿，三日就起伊。』」 |
| 26:62 | 祭司頭起來，給伊講：「你攏無應嗎？諸個人所干證你的是甚麼？」 |
| 26:63 | 若是耶穌靜靜，祭司頭給伊講：「當此個真活上帝，我命令你咒誓來給阮講，你果然是上帝的子基督抑呣是？」 |
| 26:64 | 耶穌給伊講：「你已經講啦。若是我給恁講，對此霎了後恁欲看見人子坐佇有權能者的大旁，坐天的雲來。」 |
| 26:65 | 對按呢祭司頭拆裂家己的衫，講：「伊講出僭權褻瀆的話，咱猶久欠甚麼干證啊？今恁已經聽見，伊的僭權褻瀆啦。 |
| 26:66 | 恁拍算怎樣？」應講：「伊該死。」 |
| 26:67 | 就呸涎佇伊的面，用拳頭拇掙伊，也有的用手搧伊，講： |
| 26:68 | 「基督啊，你是先知，著給阮講拍你的是是誰？」 |
| 26:69 | 彼得坐佇外院，有一個女婢近倚伊，講：「你也曾及加利利人耶穌做陣。」 |
| 26:70 | 彼得當眾人的面前呣認，講：「我呣知你啲講甚麼！」 |
| 26:71 | 出去，到院門，閣一個女婢看見伊，給佇遐的人講：「此個也曾及拿撒勒人耶穌做陣。」 |
| 26:72 | 彼得閣呣認，續咒誓講：「我呣識彼個人。」 |
| 26:73 | 有許久，邊仔啲徛的人近倚，給彼得講：「你實在也是𪜶的黨，因為對你的腔口露出。」 |
| 26:74 | 伊才咒罵，閣咒誓，講：「我呣識彼個人。」雞就啼。 |
| 26:75 | 彼得就記得耶穌的話講：「雞猶未啼，你欲三擺呣認我。」就出去外面大啼哭。 |
