走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 27:1 | 到天光，眾祭司頭及百姓的長老相及計謀攻擊耶穌愛互伊死， |
|---|---|
| 27:2 | 已經縛伊，就帶去，交互總督彼拉多。 |
| 27:3 | 彼時，賣伊的猶大看見耶穌受定罪，就退悔，將許個三十銀還諸個祭司頭及長老，講： |
| 27:4 | 「我賣無罪者的血有罪啦。」𪜶講：「及阮啥干涉？你家己打算。」 |
| 27:5 | 猶大㧒許個銀佇殿裡，退去家己吊死。 |
| 27:6 | 許個祭司頭提彼個銀，講：「這是血的價，呣通橐佇庫房。」 |
| 27:7 | 𪜶就參詳，將彼個銀去買燒磁人的園，通埋葬出外人。 |
| 27:8 | 所以彼區園到今稱做「血園」。 |
| 27:9 | 對按呢應驗早託先知耶利米所講的，講：「𪜶提受估者的價銀三十，就是以色列的子孫中有人所估的， |
| 27:10 | 用伊來買燒磁者的園；照主所命令我的。」 |
| 27:11 | 耶穌徛佇總督的面前；總督問伊講：「你是猶太人的王嗎？」耶穌給伊講：「你講就是。」 |
| 27:12 | 伊互許個祭司頭長老告，伊也無應。 |
| 27:13 | 彼時彼拉多給伊講：「許個人干證你到許多項，你無聽見嗎？」 |
| 27:14 | 耶穌無應伊一句話，致到總督大奇怪。 |
| 27:15 | 到節期總督照例放一個犯人互眾人，是照𪜶所愛的。 |
| 27:16 | 彼時有出名的犯人名叫巴拉巴。 |
| 27:17 | 𪜶已經聚集，彼拉多給𪜶講：「恁愛我放是誰互恁？是巴拉巴？抑是稱做基督的耶穌？」 |
| 27:18 | 因為知𪜶為著怨妒才解送耶穌。 |
| 27:19 | 伊坐堂的時，伊的某差人給伊講：「此個義人你呣通干涉著，因為我今仔日佇眠夢中為著伊多多艱苦。」 |
| 27:20 | 諸個祭司頭及長老教唆眾人，求放巴拉巴，滅耶穌。 |
| 27:21 | 總督應講：「此二人，恁愛我放叨落一個互恁？」𪜶講：「巴拉巴。」 |
| 27:22 | 彼拉多給𪜶講：「按呢，就稱做基督的耶穌我著怎樣辦伊？」𪜶攏講：「釘伊十字架！」 |
| 27:23 | 總督講：「怎樣？伊有行甚麼歹？」𪜶大聲喝講：「釘伊十字架！」 |
| 27:24 | 彼拉多看見無採工，反轉愈擾亂，就捧水佇眾人的面前洗手，講：「佇此個義人的血，我無罪，恁家己打算。」 |
| 27:25 | 百姓攏應伊講：「伊的血歸佇阮及阮的子孫。」 |
| 27:26 | 伊就放巴拉巴互𪜶，已經鞭拍耶穌，就發交去釘十字架。 |
| 27:27 | 彼時總督的兵帶耶穌入公堂，聚集通營圍伊。 |
| 27:28 | 褪伊的衫，將紅袍給伊穿， |
| 27:29 | 用莿仔編冕旒，戴佇伊的頭殼，用蘆竹下佇伊的正手，跪佇伊的面前戲弄伊講：「猶太人的王，平安！」 |
| 27:30 | 就給伊呸涎，抬彼枝蘆竹來捽伊的頭殼。 |
| 27:31 | 戲弄息，彼領袍就給伊褪起來，將伊家己的衫給伊穿，帶伊去，釘十字架。 |
| 27:32 | 出來的時，抵著一個古利奈人名西門，勉強伊相及去，互伊夯耶穌的十字架。 |
| 27:33 | 到一所在名各各他，就是「頭殼碗」的所在。就用苦膽所調和的酒互伊飲； |
| 27:34 | 伊試看，就呣飲。 |
| 27:35 | 已經釘伊佇十字架，就做鬮分伊的衣服， |
| 27:36 | 閣坐佇遐顧守伊。 |
| 27:37 | 就下斬條佇伊頭殼的頂面，寫講：「此個是猶太人的王耶穌。」 |
| 27:38 | 彼時，有二個賊及伊同釘佇十字架，一個佇正旁，一個佇倒旁。 |
| 27:39 | 經過的人譏刺伊，搖頭，講： |
| 27:40 | 「你毀壞殿，三日閣起的，著救家己！你若是上帝的子，著對十字架落來！」 |
| 27:41 | 許個祭司頭及經學士以及長老也是按呢戲弄伊，講： |
| 27:42 | 「伊曾救別人，𣍐會救家己。伊做以色列的王，今著對十字架落來，阮就欲信伊。 |
| 27:43 | 伊倚靠上帝，上帝若歡喜伊，今就著救伊；因為伊講：『我就是上帝的子。』」 |
| 27:44 | 及伊同釘彼二個賊也是按呢罵伊。 |
| 27:45 | 對日中晝到三點，遍地黑暗。 |
| 27:46 | 差不多三點，耶穌大聲喉叫講：「以利！以利！拉馬撒各大尼？」就是講：「我的上帝！我的上帝！你啥事放離我？」 |
| 27:47 | 邊頭徛的有人聽見就講：「伊啲叫以利亞！」 |
| 27:48 | 中間一人即時走去，提海絨浸醋，縖佇蘆竹仔尾，互伊吸。 |
| 27:49 | 其餘的講：「且慢，看以利亞來救伊抑無。」 |
| 27:50 | 耶穌閣大聲喉叫，就斷氣。 |
| 27:51 | 忽然，殿內的帳對頂到下裂做二旁，地動，石磐裂， |
| 27:52 | 墓開，已經啲睏的聖徒，𪜶的身軀多多起來，對𪜶的墓出。 |
| 27:53 | 到耶穌復活了後，𪜶入聖城，出現佇多多人。 |
| 27:54 | 百總及相同顧守耶穌的看見地動及所經過的事，不止驚，講：「此個果然是上帝的子！」 |
| 27:55 | 有多多婦仁人佇遐，遠遠啲看；𪜶就是對加利利跟隨耶穌來服事伊的。 |
| 27:56 | 從中有抹大拉的馬利亞、雅各、約西的老母馬利亞，及西庇太的子的老母。 |
| 27:57 | 已經暗，有亞利馬太的好額人來，名做約瑟，伊也是耶穌的學生。 |
| 27:58 | 彼人去見彼拉多，求耶穌的身屍；彼拉多吩咐著互伊。 |
| 27:59 | 約瑟收彼個身屍，用清氣的幼布包伊， |
| 27:60 | 下佇伊家己的新墓，就是伊佇石磐所拍的。就翱大塊石佇墓門，才去。 |
| 27:61 | 有抹大拉的馬利亞及別個馬利亞佇遐，坐佇墓的對面。 |
| 27:62 | 隔日，就是備辦節後的一日，許個祭司頭及法利賽人聚集見彼拉多，講： |
| 27:63 | 「大人啊，阮記得彼個迷惑人的，活啲的時曾講：『三日後我欲復活。』 |
| 27:64 | 所以請你命令顧守彼個墓，到第三日，驚了伊的學生來偷伊去，亦給百姓講：『伊對死人中復活。』按呢，就後來的差謬比代先卡利害！」 |
| 27:65 | 彼拉多給𪜶講：「恁領兵去，照恁所知影的去顧守。」 |
| 27:66 | 𪜶就去，封石及設兵，來顧守彼個墓。 |
