走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 12:1 | 當彼時，耶穌佇安息日對麥園經過。伊的學生枵，就摘麥穗來食。 |
|---|---|
| 12:2 | 若是法利賽人看見，就給伊講：「你看，你的學生行安息日所呣應該行的事！」 |
| 12:3 | 耶穌就給𪜶講：「大衛及跟隨的人枵的時所行的，恁無讀著嗎？ |
| 12:4 | 就是伊入上帝的厝，食排列的餅，這呣是伊及跟隨的人所通食的，獨獨祭司通若定。 |
| 12:5 | 抑是，恁亦呣曾讀律法所記載，當安息日，祭司佇殿裡犯著安息亦是無罪嗎？ |
| 12:6 | 獨獨我給恁講，佇遮有比殿卡大的。 |
| 12:7 | 總是恁若知，『我愛憐憫，無愛祭祀。』此句的意義，就無責罪無罪的人。 |
| 12:8 | 因為人子是安息日的主。」 |
| 12:9 | 耶穌離開遐，入𪜶的會堂。抵當有人一手枯焦。 |
| 12:10 | 人問伊講：「安息日行醫通嗎？」意思愛欲告伊。 |
| 12:11 | 伊就給𪜶講：「恁中間甚麼人有一隻羊，若佇安息日跋落坑，無給伊掠起來嗎？ |
| 12:12 | 何況人比羊加偌貴氣啊！所以，安息日行好事是通。」 |
| 12:13 | 就給彼人講：「伸你的手！」伊就伸，隨時好好，親像別支手。 |
| 12:14 | 法利賽人出去，相及計謀攻擊耶穌，看通怎樣滅伊。 |
| 12:15 | 耶穌知，就退去，離開遐，有多多人隨伊。就攏給𪜶醫； |
| 12:16 | 亦警戒𪜶，莫得將伊報揚。 |
| 12:17 | 是欲應驗託先知以賽亞所講的，講： |
| 12:18 | 你看，我的奴僕，我所揀的、我所疼的、我的心所歡喜的，我欲將我的神付互伊；伊欲用判斷通知外邦。 |
| 12:19 | 伊無欲相爭，無欲喧嚷；佇街市無人聽見伊的聲。 |
| 12:20 | 受傷的蘆竹，伊無欲遏折；欲熄的火星，伊無拍熄；到互公義會得勝。 |
| 12:21 | 外邦亦欲靠伊的名來向望。 |
| 12:22 | 彼時，有導一個患著鬼、睛暝掛啞口者來就近伊，伊就醫好伊，互啞口者講話，續會看見。 |
| 12:23 | 眾人攏卬愕，講：「此個總無是大衛的後裔哦？」 |
| 12:24 | 若是法利賽人聽見，就講：「此人趕鬼無呣是靠鬼王別西卜。」 |
| 12:25 | 耶穌知𪜶的意思，就給𪜶講：「見若國家己爭拼，會致到拋荒；見若城抑是家家己爭拼，的確徛𣍐住； |
| 12:26 | 若撒但趕撒但，是家己爭拼，伊的國豈可徛會住？ |
| 12:27 | 設使我靠別西卜趕鬼，就恁的子弟趕鬼倚靠是誰啊？按呢，𪜶欲擬斷恁。 |
| 12:28 | 獨獨我若靠上帝的神趕鬼，就上帝的國已經到恁啦。 |
| 12:29 | 人怎樣會入猛人的厝，劫伊的家伙？豈呣著代先縛猛人，然後劫伊的厝嗎？ |
| 12:30 | 無同我的，就是對敵我；無及我收拾的，就是啲拍散。」 |
| 12:31 | 所以我給恁講：「見若罪惡謗瀆攏欲赦免伊，獨獨謗瀆聖神的，無欲赦免伊。 |
| 12:32 | 見若講話攻擊人子的，欲赦免伊；獨獨見若講話攻擊聖神的，不論今世來世，無欲赦免伊。」 |
| 12:33 | 「恁著掠彼個樹做好，伊的果子亦做好；或是掠彼個樹做歹，伊的果子亦做歹；因為對果子來識樹。 |
| 12:34 | 毒蛇的類啊！恁已經是歹，豈會講好話？因為是對心所充滿的，嘴就講出。 |
| 12:35 | 好人對所積聚的好，來發出諸個好；歹人對所積聚的歹，來發出諸個歹。 |
| 12:36 | 我給恁講，見若人所講的閒仔話，𪜶佇審判日，逐句著訴明； |
| 12:37 | 因為對你的話欲稱你做義，亦對你的話欲擬你有罪。」 |
| 12:38 | 彼時，有經學士及法利賽幾若人應伊講：「先生啊，阮愛對你看一個神蹟。」 |
| 12:39 | 若是伊應講：「惡毒姦淫的世代求神蹟，除先知約拿的神蹟以外，無欲神蹟互𪜶。 |
| 12:40 | 因為親像約拿三日三暝佇大魚的腹肚內，人子亦欲按呢三日三暝佇地內。 |
| 12:41 | 尼尼微人當審判的時，欲及此世代的人相及起來，續擬𪜶的罪，因為𪜶對約拿所傳來反悔。何況佇遮有比約拿卡大的！ |
| 12:42 | 南方的女王當審判的時，欲及此世代的人相及起來，續擬𪜶的罪；因為伊對地的極頭來，欲聽所羅門智識的話。何況佇遮有比所羅門卡大的！」 |
| 12:43 | 「邪神已經離開人，經過無水的地，求安息，亦無得著。 |
| 12:44 | 就講：『我欲倒去所出來的厝。』到地，就看見空空，傾掃，修整，就去，閣帶七個神比家己卡歹的，入去徛起， |
| 12:45 | 彼人路尾的景況比起頭的卡慘。此個歹的世代亦欲親像按呢。」 |
| 12:46 | 伊猶對眾人講話的時，抵當伊的老母及伊的兄弟徛佇外面，愛欲及伊講話。 |
| 12:47 | 有人給伊講：「你看，你的老母及你的兄弟徛佇外面，愛欲及你講話。」 |
| 12:48 | 就應彼個給伊講的講：「甚麼人是我的老母？甚麼人是我的兄弟啊？」 |
| 12:49 | 就伸手指伊的學生，講：「你看，我的老母及我的兄弟。 |
| 12:50 | 因為見若行我佇天裡的父的旨意的，就是我的兄弟姊妹及老母。」 |
