走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 15:1 | 彼時，有法利賽人及經學士，對耶路撒冷來就近耶穌，講： |
|---|---|
| 15:2 | 「你的學生啥事犯著古早人的流傳？因為食的時，𪜶無洗手。」 |
| 15:3 | 伊就應講：「啥事恁亦對恁的流傳來犯著上帝的命令啊？ |
| 15:4 | 因為上帝講：『著敬恁的父，恁的母』；閣有講：『罵父抑是罵母的，的確著互伊死。』 |
| 15:5 | 若是恁就講：『見若人對父抑是母講：你本所會通對我得著的利益已經獻去， |
| 15:6 | 彼人就決斷無敬伊的父。』恁就對恁的流傳已經廢上帝的道理。 |
| 15:7 | 假好的人啊，以賽亞指恁來讖語的真正著。伊講： |
| 15:8 | 此個百姓用嘴唇尊敬我，若是𪜶的心離開我遠遠； |
| 15:9 | 𪜶敬拜我是空空，因為𪜶用人所命令的做教示來教示人。」 |
| 15:10 | 就叫眾人來，給𪜶講：「恁著聽來曉悟。 |
| 15:11 | 呣是對嘴入的會互人污穢，就是對嘴出的此個會互人污穢。」 |
| 15:12 | 彼時學生就近來給伊講：「法利賽人聽見此個話，真呣願，你知嗎？」 |
| 15:13 | 伊應講：「見若栽種的物，呣是我的天父所栽種的，欲拔伊的根。 |
| 15:14 | 出在𪜶！𪜶是睛暝啲導路的；若是睛暝給睛暝的導路，二個啲欲跋落陷坑。」 |
| 15:15 | 彼得應伊講：「此個譬喻請給阮解明。」 |
| 15:16 | 伊就講：「恁亦猶久未曉悟嗎？ |
| 15:17 | 豈𣍐曉得見若對嘴入的，落佇腹肚，來放佇廁池啊？ |
| 15:18 | 若是對嘴出的，是對心內發出，諸個互人污穢。 |
| 15:19 | 因為對心發出歹念頭、行兇、姦淫、私通、偷提、濫糝干證、謗瀆。 |
| 15:20 | 諸個是互人污穢；若是無洗手來食，𣍐互人污穢。」 |
| 15:21 | 耶穌對遐出去，退去到推羅、西頓的境界。 |
| 15:22 | 抵當有迦南的婦仁人出𪜶的交界，喉叫講：「主啊！大衛的後裔，憐憫我！我的查某子患著鬼真艱苦。」 |
| 15:23 | 耶穌無應伊一句。伊的學生來，求伊講：「著教伊去，因為伊佇咱的後面啲喉叫。」 |
| 15:24 | 伊就應講：「我奉差無呣是就近以色列家失落的羊若定。」 |
| 15:25 | 婦仁人來拜伊，講：「主啊，幫助我！」 |
| 15:26 | 若是伊講：「提子兒的餅㧒互狗仔是呣合。」 |
| 15:27 | 婦仁人講：「主啊，著；因為連狗仔亦會得食𪜶的主人桌腳磕落的餅幼。」 |
| 15:28 | 對按呢耶穌應講：「婦仁人啊，你的信大啦！照你所愛的，給你做成。」對彼時，伊的查某子已經好。 |
| 15:29 | 耶穌離開遐，到加利利海邊，上山啲坐， |
| 15:30 | 有多多陣的人就近伊，續帶跛腳的、睛暝的、啞口者、破相的，及多多別款的來，下佇伊的腳前；就醫好𪜶。 |
| 15:31 | 致到眾人卬愕；因為看見啞口者講話，破相的攏好，跛腳的行，睛暝的看見，就歸榮光以色列的上帝。 |
| 15:32 | 耶穌叫伊的學生來，講：「我憐憫諸個人；因為𪜶已經及我住三日，亦無物通食。我呣甘互𪜶枵枵去，驚了𪜶路裡厭倦。」 |
| 15:33 | 學生給伊講：「阮佇曠野，對叨落有許多餅通互即多人食飽？」 |
| 15:34 | 耶穌給𪜶講：「恁有偌多餅？」應講：「七個，及淡薄細尾魚。」 |
| 15:35 | 就吩咐眾人坐佇地裡， |
| 15:36 | 提彼七個餅及魚，祝謝，擘，交互學生；學生就互眾人， |
| 15:37 | 攏食到飽，拾所剩的屑仔，貯滿七籃。 |
| 15:38 | 食者，婦仁人囝仔以外，共四千人。 |
| 15:39 | 既然互眾人四散，就上船，到馬加但的交界。 |
