走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 29:1 | 唉啊！亞利伊勒，亞利伊勒，大衛安營的城，恁一年過一年，節期照常輪流。 |
|---|---|
| 29:2 | 我欲互亞利伊勒困難；伊欲有悲傷哀哭，總是我欲看伊做亞利伊勒。 |
| 29:3 | 我欲四圍安營攻擊你，起土堆拍你，起高台攻擊你。 |
| 29:4 | 你欲降低，對地中講話；你的言語欲細細對塵埃出來。你的聲音欲親像鬼上身者的聲音對地出來；你的言語噭噭哮對塵埃出。 |
| 29:5 | 你的對敵的大隊，欲親像幼的土粉；強暴人的大隊，欲親像飛的粗糠。此個事欲霎仔久的中間忽然臨到。 |
| 29:6 | 萬軍的耶和華欲用雷鳴、地動、大聲、捲螺風、大風，及吞滅的火焰，臨到伊。 |
| 29:7 | 彼時，攻擊亞利伊勒眾國的大隊，就是一切攻擊伊及伊的衛所，及苦楚伊的，欲親像夢見，親像暝時的異象； |
| 29:8 | 欲親像枵的人夢見啲食，到精神心猶原知空空；抑是親像嘴乾的人夢見啲飲，到精神猶原厭倦，想欲飲。眾國的大隊及錫安山交戰者，亦欲親像按呢。 |
| 29:9 | 恁著卬愕奇怪！恁著家己遮蔽來睛暝！𪜶醉，呣是因為酒；𪜶顛來顛去，呣是因為厚酒。 |
| 29:10 | 因為耶和華將睏重眠的神灌佇恁的頂面，封密恁的目睭，蓋密恁的頭殼。恁的目睭就是先知；恁的頭殼就是先見者。 |
| 29:11 | 所有的默示，對佇恁親像封啲的字樣，人將此個字樣交互識字的人，講：「請讀伊！」伊講：「我𣍐會，因為封啲。」 |
| 29:12 | 閣將此個字樣交互呣識字的人，講：「請讀伊！」伊講：「我呣識字。」 |
| 29:13 | 主講：因為此個百姓親近我，用嘴、用嘴唇尊敬我，心就離開我遠遠；𪜶的尊敬我，不過是趁人所教示的命令若定。 |
| 29:14 | 所以，我欲閣用奇妙的事款待此個百姓，彼個事就是奇妙閣奇異。𪜶智慧人的智慧欲消無，𪜶聰明人的聰明欲蓋密。 |
| 29:15 | 災禍啊！許個向耶和華深深囥𪜶的計謀，閣佇暗中行代誌者，講：是誰看見阮？是誰知阮啊？ |
| 29:16 | 嗐啊，恁悖謬啦！豈通看燒磁人親像土嗎？受造的物豈通論造伊者講：伊無造我嗎？抑是受做的物件，豈通論做伊者講：伊無聰明嗎？ |
| 29:17 | 豈呣是霎仔久的時，黎巴嫩變做好的田，好的田看做樹林嗎？ |
| 29:18 | 彼日，臭耳聾者的欲聽見冊內的話；睛暝人的目睭欲對矇霧黑暗中得著看見。 |
| 29:19 | 謙卑的人欲因為耶和華來加添𪜶的歡喜；人間的喪鄉人欲因為以色列的聖者來快樂。 |
| 29:20 | 因為，強暴人已經歸佇無，侮慢的人已經滅絕，一切尋機會做歹的人攏受剪除。 |
| 29:21 | 𪜶為著一句話來責罪人，設活罩來陷害佇城門督責人者，用無影的事枉屈義人。 |
| 29:22 | 所以，救贖亞伯拉罕的耶和華論雅各的家按呢講：雅各今的確無閣見誚，伊的面亦無變色。 |
| 29:23 | 總是伊看見伊的眾子，就是我的手所做的佇伊的中間，𪜶欲尊我的名做聖，欲尊雅各的聖者做聖，欲敬畏以色列的上帝。 |
| 29:24 | 心內糊塗者欲得著明白；呣甘願者欲受教訓。 |
