走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 59:1 | 看啊，耶和華的手呣是短，𣍐會拯救，耳孔呣是重，𣍐會聽， |
|---|---|
| 59:2 | 就是恁的罪過互恁及上帝隔斷；恁的罪惡互伊對恁掩面無聽； |
| 59:3 | 因為恁的手染著血，恁的指頭仔染著罪惡，恁的嘴唇講白賊，恁的舌講出歹話。 |
| 59:4 | 無人用公義來稟明，無人照誠實來辯護；攏是倚靠虛假，講白賊。所懷孕者是殘害；所生者是邪僻。 |
| 59:5 | 𪜶孵毒蛇的卵，經蜘蛛網；人食伊的卵的確死。此個卵若踏破，的確出惡蛇。 |
| 59:6 | 𪜶所經的網𣍐會成做衣服，𪜶所做的𣍐會家己遮蓋。𪜶所行的攏是罪惡；𪜶的手所做的攏是強暴。 |
| 59:7 | 𪜶的腳走來行歹；𪜶緊緊欲流無罪的人的血；𪜶的念頭攏是邪僻的念頭，所經過的大路攏是拋荒毀滅。 |
| 59:8 | 平安的路，𪜶呣知；所行的路徑無有公平。𪜶為著本身造彎曲的路；見若行伊的攏𣍐曉得平安。 |
| 59:9 | 因為按呢，公平離開阮遠遠，公義追阮無著。阮向望光亮，反轉是黑暗，向望光明，反轉行佇暗中。 |
| 59:10 | 阮摸牆倚壁，親像睛暝人；阮四界摸，親像無目睭的人。阮日中晝顛顛倒倒，親像黃昏的時一樣；阮佇勇壯的人的中間，親像死人一樣。 |
| 59:11 | 阮哮親像熊，哀哀孱親像鳩鵻；向望公平，總是攏無；向望救恩，總是離開阮遠遠。 |
| 59:12 | 阮的過失佇你的面前加添多多，罪惡做干證告阮；罪過及阮相及佇啲。論到阮的罪過，阮攏知； |
| 59:13 | 就是悖逆、呣認耶和華，越倒轉呣隨阮的上帝，講出制壓及悖逆的話，心想白賊話，就續講出。 |
| 59:14 | 閣公平轉返退後，公義徛佇遠遠；誠實跋倒佇街路，正直亦𣍐進入。 |
| 59:15 | 誠實少少；離開歹的反轉成做受搶的物。彼時，耶和華看見因為無公義，就不止無歡喜。 |
| 59:16 | 伊看無人拯救，無人替求，不止卬愕，就用家己的手來救家己，用伊的公義扶持本身。 |
| 59:17 | 伊用公義做盔甲來穿，用拯救做頭盔來戴，用報仇讎做衣服來穿，用熱心做外袍來𧜞。 |
| 59:18 | 伊欲照𪜶的行做來報應，受氣伊的對敵，報應伊的仇讎對眾海嶼行報應。 |
| 59:19 | 按呢，人對日落的所在欲敬畏耶和華的名，對日出的地方，亦欲敬畏伊的榮光；因為伊欲來親像緊流的河水，是耶和華的氣所催迫的。 |
| 59:20 | 欲有一位救贖的主來到錫安──亦到雅各族中離開過失的人遐。這是耶和華講的。 |
| 59:21 | 耶和華講：「論到我，我及𪜶所立的約就是按呢：我的神佇你的頂面的，我的話我所下佇你的嘴的，無欲離開你的嘴，無離開你的子孫的嘴，亦無離開你的子子孫孫的嘴，對今到永遠；這是耶和華講的。」 |
